ఉత్తరరామాయణము - హేమంతర్తు ప్రవేశము - తద్వర్ణనము - ఆంధ్రభారతి

హేమంతర్తు ప్రవేశము - తద్వర్ణనము

కం.	శిశిరమరుదెంచె నంతట నిశలాయతగతి వహించె, నెత్తమ్మి తెగల్‌ కుశలత డించె, దినంబులు గృశియించె, వడంకు ముంచె నెల్లజనములన్‌.	282
కం.	అంబరమణి సాంబరుఁడ య్యుం బరువిడుఁజరమగిలికి నర్వుంశకుఁడ య్యుం బవమానసఖుఁడు మం చంబుల క్రిందటనె డాఁగుఁజవి యల్పంబే?	283
సీ.	ముద్దుగుమ్మల మొగంబులఁ జూడనే కాని - మానసింపరు చందమామఁజూడ జవరాండ్ర మందహాసముల చెంతలఁగాని - నిలువరు పండువెన్నెలల బైట సకుల కెమ్మోవి పానకము గ్రోలనె కాని - కాంక్షసేయరు పానకములు గ్రోలఁ జెలువల కుచదుర్గములకుఁబ్రాకనె కాని - తలఁపరు కృతకభూధరములెక్కఁ
గీ.	జెలుల నాభిసరస్సులఁజేరఁగాని యొల్లరు సరస్సులనుజేరి యోలలాడ మానినుల కమ్మయూర్పులె గాని సురఁటి గాలి రానీయ రధిపు లక్కాలమునను.	284
సీ.	దినముఁబ్రాతస్స్నాన మొనరించు ద్విజులకు - నగు కర్మలోప భయంబుకంటె బ్రాచి పనుల్‌ సేయ లేచు కోడండ్ర కౌ - నత్తలవలని భయంబుకంటె గడువులో దూర మేగఁగనున్న చరులకు - నధిపుచే నొదవు భయంబుకంటెఁ గర్షణం బొనరింపఁ గడఁగు కాపుల కార - యవిఁబైరు చెడునన్‌ భయంబుకంటెఁ
ఆ.వె.	గడిదియయ్యె సీతు ఖగమృగ పశువర ప్రముఖ జంతువులకు భావములను జాలమించె మిథున సంపర్క సౌఖ్యంబు శిశిర మహిమ వినుతి సేయవశమె?	285
కం.	కాచె నుసిరికలు తఱుచుగఁ బూచెన్‌ జేమంతి విరులు భూమికి బరువై తోఁచెఁ జణకాది సస్యము లేచెన్‌ బలుమంచు చదల హేమంతమునన్‌.	286
తే.గీ.	ఎల్ల జనములఁ దలచూప నీకు వెలయు నల్ల హేమంత ఋతురాజ యశము దిశల నావరించెనో యనఁగ మంచుగ్గలించె రోదసి నతంద్ర చంద్రికా రుచిరరుచుల.	287
ఆ.వె.	కొండలెల్ల మంచుఁగొండలై కనిపించె నడవులెల్లఁబూచినటుల మించె దీవులెల్లఁ దెల్లదీవులై రహిఁగాంచె మాపురేపు మించు మంచువలన.	288
శా.	ప్రాతర్వేళల మంచు చిన్కు గుమి జొంపంబైన లేఁబచ్చికల్‌ శ్వేతశ్రీఁదులకించు టెంతయు రహించెన్‌ సర్వభూతంబులున్‌ శీతశ్రాంతి వడంకఁదా నచలయై చెల్వొందు భూదేవికిన్‌ శీతర్తుప్రభుఁ డిచ్చు వజ్రముల రాశింబోవి నల్వంకలన్‌.	289
వ.	తత్కాలంబునన్‌	290
చం.	వలపులు గ్రమ్మఁగా బొగిచి వండిన కారపుఁగాయగూరల ప్పళములు దియ్యచే రొలుపుఁబప్పు రసావళు వింపుటోగిరం బు లపుడు గాఁచి తెచ్చు ఘృతముం బలుమాంసము లర్కపుత్రము ఖ్యులు రఘురాము బంతిఁబ్రియమొప్ప భుజించి సుఖించిరెంతయున్‌.	291