ఉత్తరరామాయణము - అగస్త్యాది మహర్షులు శ్రీరామునిఁ గీర్తించుట - ఆంధ్రభారతి

అగస్త్యాది మహర్షులు శ్రీరామునిఁ గీర్తించుట

ఉ.	లోకము నీ దృగంచల విలోకమునన్‌ రహిఁజెందె భాస్కరా లోకమునం బయోజని వెలుంగు రహిన్‌ సుజనావనైకలీ లాకుశల ప్రభావము సెలంగ జగం బిటు లీవు ప్రోవఁగా మా కుశలంబు వేఱ యొక మాటడుగన్‌ వలెనా రఘూత్తమా!	96
శా.	శీలక్ష్మాధరవజ్రి తాపసజనశ్రేణీతపస్యానిల వ్యాళస్వామి పరాంగనారతిలతావాలంబు ధర్మాంబురు ట్కాలాంభోదము రావణుం డరిగె నీ కాండాగ్ని చే మా తపం బేలా గొందెడు విఘ్న మేఁచు ఖలుఁ డిం కెవ్వాఁడు సీతాధిపా!	97
తే.గీ.	అనిమిషుల గుండెలో గాల మఖిలలోక నేత్రమున నాటి వేధించు నెరసు గాలి కాలి ముల్లు కుభృత్పాళి పాలి పిడుగు రావణుఁడు డిందె భువనముల్‌ రక్తిఁ జెందె	98
సీ.	ముసుఁ గేసికొని మూలమూల దాఁగిన దిశా - ధిపుల కిప్పుడు బయల్‌ దేఱఁ గలిగె గులుకు లొందక కొండగుహల ద్రిమ్మరు వేల్పుఁ - జెలుల కిప్పుడు చెల్వుసేయఁ గలిగె జపతపంబులు మాని జడవృత్తి దిరుగు మౌ - నులకు నిప్పుడు నిష్ఠ సలుపఁ గలిగె ననదలై గతిమాలి చనిన భేచరుల కి - ప్పుడు విమానము లెక్కి పోవఁ గలిగెఁ
గీ.	బడగ లెత్తక పడుకులఁ బట్టి యడఁగి యున్న ఫణిజాతి కిప్పుడు వన్నె గలిగె దశరథకుమార తిలక! నీ ధర్మమునను దనుజవిభు ద్రుంచి భయము మాన్పినకతమున	99
సీ.	మునుల పాలిటివాఁడ వనుట కాదిని నీవు - సవరించు యజ్ఞరక్షణమె సాక్షి యతిపావనుఁడ వౌట కల యహల్యాదోష - రాశిఁ ద్రోచిన పాదరజమె సాక్షి భువనాధికుఁడవౌట కవిరతోద్ధతిశూలి - విలు దళించిన బాహు బలమె సాక్షి యఘటనప్రఘటనోద్యముఁడ వౌటకు ఱాలు - నీటిపైఁ దేలించు నేర్పె సాక్షి
గీ.	యఖిల జీవేశ్వరుఁ డవైన యందులకును వనచరులచేతఁ దగు పనుల్‌ గొనుటె సాక్షి యిట్టి నీ కేము దీవింప నీ ప్రతాప మీ యశముఁ గల్గెనను మాటకేమి సాక్షి?	100
కం.	ఐన నిజాశ్రిత పక్షము చేనానతి యిచ్చితిరి విశిష్టుల మనుచున్‌ మీ నామము జపియింపం గానె కద! ప్రతిష్ఠ మాకుఁ గలిగె జగములన్‌	101
సీ.	ఖలశిక్ష సాధురక్షయు నొనర్పనెకదా - గురునాజ్ఞ వని నీవు దిరుగు టెల్లఁ బగతు ఖండింప నెపంబు గల్గనెకదా - సతినొంటి యిడి వేఁట సనుటయెల్లఁ గాందిశీకులఁ బ్రోచు కరుణఁ జూపనెకదా - భానునందనునిఁ జేపట్టు టెల్ల నేకాంత భక్తుఁడౌ టెఱిఁగి యేలనెకదా - హనుమచే నుంగరం బనుపు టెల్ల
గీ.	గణన సేయక దశకంఠుఁ దృణముగాఁ ద లంచియె కదా విభీషణు లంక కబ్ధి కట్టకయ మున్నె పట్టంబు గట్టుటెల్ల రవిసహస్రమహస్సాంద్ర! రామచంద్ర!	102
సీ.	కులకర్త నింతి మీ గురునంపి మాన్పు నా - యకు భంగమని గంగ యమున కనియెఁ దనతోడఁబుట్టు వింద్రుని కగ్గమాయెఁ గా - యని గౌరి పతి మొగం బట్టె చూచె మామ నీగతిఁ గలంపఁగ నాయమే యంచుఁ - బరవాసుదేవుతోఁ బద్మ వలికెఁ దిరుగ నబ్ధులతోడఁ ద్రిభువనంబు లొనర్ప - వలయునో యని వాణి వరుని నడిగెఁ
గీ.	దన హయంబుల కెల్ల జీవనము లిచ్చు నప్ప్రభుఁడు నొచ్చెనో యంచు నడలె వజ్రి బాడబజ్వాల లట్లు నీ పటుశరములు వార్ధి నింకించు నప్పు డిక్ష్వాకుతిలక!	103
చం.	కరమున నీవు విల్లుగొని కాండముఁ బూనిన మూఁడులోకముల్‌ కరము భయంబు నొందుఁ గడఁకన్‌ నిను మార్కొన నెవ్వఁడోపు భీ కరముఖ నిర్గతానల శిఖాపరిదగ్ధ సుపర్వు రావణున్‌ దురమున బంధుయుక్తముగఁ ద్రుంపఁగ నీకె తగున్‌ రఘూద్వహా!	104
సీ.	అమితాస్త్రశస్త్రప్రహస్తుఁడైన ప్రహస్తుఁ - డురుమహోదరుఁ డమ్మహోదరుండు చండయుద్ధాకంపనుం డకంపనుఁడు దే - వాంతకుండైన దేవాంతకుండు కువచోనిగుంభుండు కుంభుం డుదితశత్రు - దానికుంభుండు నాఁ దగు నికుంభుఁ డహితవిరూపాక్షుఁ డగు విరూపాక్షుండు - యతియజ్ఞ కోపుఁడౌ యజ్ఞకోపుఁ
గీ.	డాదిగాఁ గల దైతేయు లడఁగి రుగ్ర సంగరంబున నీ యోధసమితిఁ దొడరి కడఁక నతికాయుఁడగు నతికాయుఁ డీల్గె నీ సహోదరుచేత సీతాసమేత!	105
మ.	ప్రళయాబ్ద ప్రతిమాప్రమాణ తను శుంభత్కుంభకర్ణాద్రి నీ కులిశాత్యుగ్ర నిశాతబాణహతులం గూలెన్‌ దశగ్రీవదో ర్బలమైనన్‌ సహియింపవచ్చు సహియింపం గూడునే యింద్రజి ద్బల మవ్వీరుఁడు సచ్చె నీకు హిత మాపాదించు సౌమిత్రిచేన్‌	106
మ.	సురకన్యాకబరీ పరిగ్రహణజాశుభ్రాపకీర్తిచ్ఛటా భర సంసూచకవర్ణు రావణసుతున్‌ భంజించు టింద్రాది భీ కర పౌలస్త్యముఖాసురప్రవరులన్‌ ఖండించు కార్యంబుతో సరియౌ నందునఁ గాదె నిర్భయత మించం గల్గె జేజేలకున్‌	107
కం.	జేజేయని జగ మెంచఁగ జేజేలకు నభయ మొసఁగి చెలఁగితివి బళీ యాజేయ వీరదైతే యాజేయజయాప్తి నలరుమని యగ్గింపన్‌	108
కం.	ఆ రాముఁడు బుధవిహగ చ యారాముఁడు వెఱఁగు సెంది యంజలియుతుఁడై వారలఁ గని గగనధునీ వారలఘు ఘుమంఘుమారవంబునఁ బలికెన్‌	109
సీ.	ఘటకర్ణ కంపనాకంపనాదుల మాని - యింద్రజిత్తు ప్రతాప మెంచనేల? ధూమ్రాక్ష యూపాక్షదుర్ముఖాదుల మాని - యింద్రజిత్తు ప్రతాప మెంచనేల? యతికాయవికట ప్రహస్తాదులను మాని - యింద్రజిత్తు ప్రతాప మెంచనేల? త్రిశిరోనరాంతక త్రిదశాంతకుల మాని - యింద్రజిత్తు ప్రతాప మెంచనేల?
గీ.	వారికంటెను వీఁడంత వీరుఁడైన కారణం బేమి జన్మ ప్రకార మెట్టు లెవ్వరి వరంబుచే నిర్జరేంద్రు గెలిచె నెటులు దనదండ్రికంటెఁ దా నెక్కుడయ్యె?	110