ఉత్తరరామాయణము - యక్షరాక్షసుల యుద్ధము - ఆంధ్రభారతి

యక్షరాక్షసుల యుద్ధము

ఉ.	యక్షవరాజ్ఞ మౌళినిడి యక్షులు నక్షుల నిప్పులుర్ల హ ర్యక్షములో యనన్‌ గహకహార్భటు లభ్రము నిండఁ జేయుచున్‌ రాక్షస సేనఁ దాఁకి రల రాక్షసులున్‌ నలిరేఁగి మార్కొనం ద్య్రక్షధరాధరం బదరె నంబుజపత్త్రగతిం దదుద్ధతిన్‌	8
మ.	అసిఘర్షోదిత విస్ఫులింగమయమై యస్త్రానలాభీలకీ లసముజ్జృంభితమై గదాముసల శూలప్రాస సంప్రేరణా వసరాన్యోన్యకృతాభినందన వచోవ్యాపారమై యక్షరా క్షససంగ్రామము సూచు ఖేచరులకుం గల్పించె దృక్పర్వమున్‌	9
శా.	దోరుత్తుంగతరంగముల్‌ నిగుడఁ దద్ఘోరాసిమీనప్రభల్‌ మీఱన్‌, సైనికచంద్రు లుబ్బొసఁగ గాంభీర్యం బవార్యంబుగా భేరీభాంకృతరావ మొప్పఁ గరిభూభృత్కోటి మీఁటొందఁగాఁ బోరాడెన్‌ వడి యక్షరాక్షసబలాంభోరాశులొండొంటితోన్‌	10
వ.	అప్పుడు	11
ఉ.	కూలెడు నేనుఁగుల్‌ దెరలు గుఱ్ఱములున్‌ వడిఁ ద్రెళ్ళుతేరులున్‌ వ్రాలెడి టెక్కెముల్‌ దునిసి వమ్మగు ఛత్రము, లాడునట్టలుం దూలెడి రూపులుం దొరఁగు తోరపు నెత్తురుటేఱు లందుపైఁ దేలెడు పీనుఁగుల్‌ గలిగె ధీరతఁ బోరెడు రెండు సేనలన్‌	12
ఉ.	రాక్షససేన ముందటఁ దిరంబుగ నిల్చి రణం బొనర్చున య్యక్షులఁజూచి, పంక్తిముఖుఁ డక్షముఁడై నిజసైన్య రక్షణా ధ్యక్షుల మార్కొనం బనిచి తానును నిర్వదిచేతులన్‌ గదా సిక్షురికాది సాధన విశేష విజృంభముఁ గానుపించినన్‌	13
చం.	చెదరక యక్షులున్‌ దనుజశేఖరు బిట్టెదిరించి భీకర ప్రదరపరంపరల్‌ గురిసి పైపయి నైకవిధాయుధచ్ఛటల్‌ గుదిగొననించి బీరమునఁ గోయని యార్చినచో మహోదరుం డుదురున నొక్క ఘోరగదయూని కృతాంతుని లీల నుగ్రుఁడై	14
కం.	వాయువు బలువడిఁగుజములఁ ద్రోయు తెఱంగున గదాహతులచే క్షితిపాల్‌ గా యక్షసేనఁగూల్చె బ ళీ! యని శుకసారణాదులెల్ల నుతింపన్‌	15
కం.	శుకసారణధూమ్రాక్షా దికసేనాధీశు లొక్క దెస, దశకంఠుం డొక దెస, యక్షుల జమువీ టికి నతిథులఁజేసి రోహటింపక యధిపా!	16
ఆ.వె.	అపుడు పఱచు యక్షు లతిభీరులై పూరిఁ గఱచు యక్షు లొడలు మఱచు యక్షు లఱచు యక్షులై మహావాతధూతజీ మూతరీతిఁ జని రరాతు లలర	17
ఉ.	విచ్చిన నొచ్చినన్‌ వెఱచి వేఁడిన నోడినవారిఁ బోవనీ కచ్చెడుగుల్‌ దయారహితులై యలకాపురిదాఁకఁ గోటలోఁ జొచ్చినదాఁక వెంటఁబడి శూలములన్‌ బలితంపుటీఁటెలన్‌ గ్రుచ్చిరి, చొచ్చి వచ్చి రదిగోనని పౌరులు దల్లడిల్లఁగన్‌	18