ఉత్తరరామాయణము - రావణుఁడు కార్తవీర్యార్జునుని మీఁది కేఁగుట - ఆంధ్రభారతి

రావణుఁడు కార్తవీర్యార్జునుని మీఁది కేఁగుట

కం.	వారలలోఁ జతురులు శుక సారణు లభ్రగతు లగుచుఁ జరమదిశకుఁ ద త్తీరమునన యర యామడ దూరము సన వినిరి మదవతుల కలకలముల్‌	222
మ.	విని యక్కాంతల చెంతఁ గన్గొనిరి ప్రావృట్కాల కాలాంబుము గ్ఘన లీలాలక విస్తృతాళికు నుదగ్రస్వోగ్ర బాహాసహ స్రనిరుద్ధాబ్ధికళత్రు నిద్ధమదసంరక్తాంతనేత్రున్‌ సుమో హనగాత్రున్‌ గృతవీర్యపుత్రు జలఖేలాయత్తచిత్తాబ్జునిన్‌	223
కం.	కనుఁగొని నివ్వెఱపడి చ య్యన మగిడి దశాస్యుఁ జేరి యంజలిబంధం బొనరించి నిలిచి దేవర! వినుఁ డొక వింత యని యనిరి వేగరు లంతన్‌	224
మ.	ఘనసాలోన్నతిఁ గాంచినాఁడు మరు సింగారంబునన్‌ మించినాఁ డు నదిన్‌ స్వీయభుజాసహస్రముల నాటోపించి బంధించినాఁ డు నవీనాంబు విహార తత్పరత నాండ్రుం దా విజృంభించినాఁ డు నరగ్రామణి యెవ్వఁడో యొక బలిష్ఠుం డాసురగ్రామణీ!	225
కం.	తన కరముల వలె నివ్వా హిని తరఁగలు మించు ననెడి యీసునఁ గాఁబో లు నతండు గట్టినాఁడం దునఁ బడమర సనక తటిని తూరుపు వట్టెన్‌	226
కం.	దేవర కంటెను మించునొ దేవరకు సమానుఁడౌనొ తెలియఁబడదు మే మీవఱ కా విభుఁ బోలిన భూవరుఁ గని యెఱుఁగ మనిన బుద్ధి చలించెన్‌	227
మ.	శివపూజా నియమంబు మాని తొలి జేజే పెద్ద మాహిష్మతీ ధవుఁడాతండు బళీ! కనంబడెను. యుద్ధక్షోణి మా తారత మ్య విశేషంబులు గానిపించుఁ జనుదెం డంచున్‌ వడిన్‌ లేచి దా నవయోధుల్‌ రథదంతి వాహముఖ నానాసేనలుం గొల్వఁగన్‌	228
వ.	కదలి మదాధిక పదాతిపదాఘాతధూతధరాతల పరాగ పటలంబులతో గలసి మలసి ప్రతికూల మారుతంబు లెదురుకొన సరకు గొనక పశ్చిమోన్ముఖుండై పంక్తిముఖుండు దన్తటినీతటంబునం జని చని	229
శా.	రంభోరూశతగీతనృత్యరసనిర్మగ్నాత్ముఁడై యాత్మదోస్‌ స్తంభస్తంభితనర్మదాహ్వయ సరిత్కల్లోల జాలంబులోఁ గుంభీంద్రున్‌ బలెఁ గేళి సల్పు నృపముఖ్యున్‌ దవ్వులం జూచి ర క్తాంభోరుట్ప్రతిమానవింశతిదృశుండై రావణుం డంతటన్‌	230
శా.	చేరంబోవఁ బ్రధాను లడ్డమయి యాక్షేపించి యిట్లేఁగఁగా మేరా? నీ వెటఁ బోయె దెవ్వడవు? నెమ్మిం గొమ్మలం గూడి నేఁ డీ రా జున్న రహస్య మెన్న విదియేమీ? యన్న మీ రాజుతోఁ బోరన్‌ వచ్చితి రావణుండఁ బిలువం బొండాతనిం జెచ్చెరన్‌	231
కం.	ఊరకపోవఁడు చూచినఁ బోరక దశకంఠుఁడనిన భూరికృపాణ స్పార ప్రభ లినుఁ బొదువఁగ వారలతని కనిరి ధైర్య వైభవ మెసఁగన్‌	232
కం.	సమరమున కనుచు నొప్పని సమయంబున వచ్చి పిలువఁజనునే? నీమా త్రమున కతఁడేల? మేమో పమె? రమ్మెదిరింపఁ బంపు బలముల ననినన్‌	233
చం.	వినియు సహింప కద్దనుజవీరుని మంత్రులు రాజమంత్రులం గినుక నెదిర్చి శస్త్ర చయకీలితగాత్రులఁజేసి వారిఁగొ ల్చిన భటకోటి భక్షణము సేయుచు రక్తము లానుచున్‌ ముదం బునఁ జెలరేఁగి యార్వ నుడివోవక హైహయసైనికాగ్రణుల్‌	234
మ.	బహునారాచపరంపరల్‌ గురియుచుం బైపైఁ బ్రహస్తాది దు స్సహులై మించిన రావణుం డలిగి హస్తన్యస్త శస్త్రచ్ఛటా ప్రహతిన్‌ సేనలఁ జెక్కుచున్‌ నఱుకుచున్‌ భంజించుచున్‌ ద్రుంచుచున్‌ గహనం బగ్నిసఖుండు గూల్చుక్రియ మ్రగ్గంజేసె నొక్కుమ్మడిన్‌	235
వ.	ఇవ్విధంబున	236
చం.	హళహళితో నెదిర్చి దనుజాగ్రణిచే బహుసైనికోత్తముల్‌ గలన నడంగఁజూచి, చని, కంచుకు లప్పుడె రాజుముందటన్‌ నిలిచి పరాకుసామి! రజనీచరుఁడొక్కఁడు పెక్కురక్కసుల్‌ గెలఁకుల గొల్వ నొండు పరికింపక మీకడ కేఁగుదేరఁగాన్‌	237
కం.	అడ్డము వోయిన మంత్రుల జడ్డిగములు ద్రుంచె భటుల సందడి మాన్చెన్‌ దొడ్డ చలంబున నీ కెదు రొడ్డి విజృంభించె నవలి యెడ్డున నధిపా!	238
తే.గీ.	పేరు రావణుఁడఁట యేమొ వీరి వారిఁ గొందఱ జయించినాఁడఁట యందఱబలె మిమ్మును జయించుట కుపక్రమించినాఁడు మించినాఁ డిప్పుడదె విక్రమించినాఁడు	239
మ.	అనుమాటల్‌ పెనుగాడ్పులై నిగిడి రోషాగ్నిం బ్రవృద్ధం బొన ర్చిన ధూమంబన భ్రూకుటిస్ఫురణ మించెన్‌ - దంతఘర్షంబునం గనిపించెన్‌ విపులస్ఫులింగములు - దృక్కంజంబులన్‌ జ్వాలలు న్జనియించెన్‌ - నృపుఁడంత నన్యబలవన్యాప్లోషసంరంభియై	240
తే.గీ.	ఒదవు పరవాహినీరోధ ముజ్జగించి యిటు వృథావాహినీరోధ మేల చేయ? ననుచు నవరోధకాంతల యళుకు మాన్చి తటిని రోధంబు వాపి రోధంబు సేరి	241
ఉ.	భూధవమౌళి ధౌతపటముల్‌ ధరియించి విశేషదివ్యభూ షాధవళానులేపముల స్రక్కుల మిక్కిలి టెక్కుఁ జెందియున్‌ గ్రోధము మూర్తిఁ గైకొనిన కోపునఁ గాంచన వేష్టనోజ్జ్వలో త్సేధగదాధరుం డగుచుఁ జెచ్చెర రావణుమీఁది కేఁగఁగన్‌	242
ఆ.వె.	ఆ సహస్రకరుని నడ్డగించెఁ బ్రహస్తుఁ డతనితోడ మూఁక లావరించె ఖరకరాయుధాంశు కలన నమ్మూఁక పెం జీఁకటులను విరియఁ జేసె నతఁడు	243
చం.	అలిగి ప్రహస్తుఁడుద్దవిడి హైహయుపై ముసలంబు వైచినన్‌ బలువడిఁ దప్పఁద్రోచి గదపై కెగనెత్తి పలాశి నెత్తి సం చలనము నొంద వ్రేయఁ గులిశప్రహతాచలరాజశృంగమున్‌ బలె నతఁ డొల్లఁబోయి యిలపైఁబడియెన్‌ జడియన్‌ నిశాచరుల్‌	244
ఆ.వె.	వానిపాటుఁ జూచి వడిగలతనమెల్ల మంటఁ గలయ నున్న మంత్రివరులు నొకఁడు సనినత్రోవ నొక్కండు వోవక బీఱుబోయి పదరి పాఱుటయును	245