ఆంధ్రభారతి - కావ్యములు - విజయ విలాసము - ప్రథమాశ్వాసము

అర్జునుఁడు గంగాభవానిని నుతించుట
భుజంగ.	సునాసీర సూనుండు చూచెన్‌ నిమజ్జ జ్జనౌఘోత్పత త్పంక శంకాక రాత్మో ర్మి నిర్మగ్న నీరేజ రేఖోన్నమ ద్భృం గ నేత్రోత్సవ శ్రీని గంగా భవానిన్‌.	47
క.	సంతోష బాష్ప ధారలు దొంతరగాఁ జూచి, మ్రొక్కి, తోయధి వరసీ మంతిని, నా త్రిజగ ద్దీ వ్యంతిని, భాగీరథీ స్రవంతిని బొగడెన్‌	48
శా.	తా సైరింప కపర్ణ యుండఁగ భవ ద్గర్భంబునన్‌ దాల్చి, తే జోఽసహ్యున్‌ శరజన్ముఁ గాంచి, యల నీహార క్షమాభృత్కుమా రీ సాపత్న్యముఁ గన్న మోహపుఁ బురంధ్రీరత్నమౌ దీవ కా దే; సర్వజ్ఞుఁడు నిన్ను నేల తలపై నెక్కించుకో జాహ్నవీ!	49
క.	పెల్లు సెగఁ జల్లు విస మా తెల్లని దొర కుతికమోవఁ దివి బ్రతుకుట నీ చల్లఁ దనంబునఁ గాదే? కల్లోలవతీమతల్లి! గంగమ తల్లీ!	50
క.	పువ్వారుఁబోణివై, సరి యెవ్వా రన, భీష్ముఁ గాంచి యిం పొందితి వీ; వవ్వావి యెఱుఁగుదువె? మా యవ్వా! పోషింపఁ బాడి యగు నను నీకున్‌.	51
చ.	సకల శుభమ్ము లిమ్మనుచు సన్నుతు లీగతిఁ జేయ నా స్రవం తిక దయఁ దెల్పఁ బంచిన గతిం జనుదెంచె నుదంచ దూర్మికా నికర విలోల ఖేల దళినీ కలగాన లసత్ప్రఫుల్ల హ ల్లక సుఖడోలికా విహృతి లాలస బాలసమీర మయ్యెడన్‌	52
క.	చనుదెంచిన హా! యని, య జ్జననాయకుఁ డలరుచున్‌ విశారదుఁ గని, "యీ యనుకూల మారు తాగతిఁ గనుఁగొన నామోద సూచకం బైనదిగా	53
క.	తల నీ గంగాతీర్థము చిలికినవాఁ డీశ్వరుండు; చేరెడు లోఁ గోఁ గలిగినఁ, దరఁగలఁ దేలం గలిగినఁ దన్మహిమ లెన్నఁగాఁ దర మగునే?	54
క.	మునుకలు గంగానదిలో నొనరించుటకన్న భాగ్య మున్నదె?" యనుచున్‌ మును కలుగంగా దిగి పరి జనములు కైలా గొసంగ స్నానోన్ముఖుఁడై	55
క.	తమి నిగుడ గుడాకేశుం డమరనదీ విమలవారి నాడుచు నుండన్‌ యమునానదిఁ గూడిన తో యమునా నది తనరెఁ దత్కచామేచకమై	56
ఉ.	దానము లెన్నియే నచటి తైర్థిక భూసుర సంఘ మెల్ల డెం దాన ముదంబు చెందఁగ నొనర్చి, దృఢవ్రతచర్య నిత్యమున్‌ దానము చేయుచున్‌, హరికథా శ్రవణం బొనరించుచుండె నం దా నముచిద్విషత్తనయుఁ డాశ్రిత కల్పమహీరుహం బనన్‌	57