 |
    |
    |
 |
    |
    |
 |
 |
కావ్యములు | విజయ విలాసము | ద్వితీయాశ్వాసము |  |
| చిత్రాంగదార్జునుల పడకటింటి ముచ్చటలు | ||
| చ. |
మినుకుఁ గడాని జీనిపని మేలిమి మంచముపై వసించి యుం డినయెడ నొయ్యనన్ సఖులు నేర్పునఁ దోడ్కొని వచ్చి మ్రోల జ వ్వని నిడి తోడి చూపులకు వచ్చినవారును బోలె వెన్కకుం జని; రవుఁ గాదె పై నతను సంగర మా నవమోహనాంగికిన్ |
26 |
| ఉ. |
చంచలనేత్రఁ గాంచి నృపచంద్రుఁడు మోహము నిల్పలేక చే లాంచల మంటి, శయ్య కపు డల్లనఁ దార్చి, కవుంగిలింప నుం కించుఁ; బయంట నంట గమకించుఁ; జెలించు టదెప్పు డెప్పు డం చించుక సేపులోన మెఱయించు ననేక మనోవికారముల్ |
27 |
| ఉ. |
"కానుక గాఁగ నిత్తు బిగి కౌఁగిలి, పల్కవె కీరవాణి! నీ దౌ నుడి తేనె నా చెవుల నానఁ, గృపారస ధార నాన న న్నానన మెత్తి చూడు నలినానన! గోలతనాన నేల లో నానఁ జలంబు నీకు? మరు నాన సుమీ! విడు నాన యింతటన్ |
28 |
| ఉ. |
చక్కెరవింటి దేవర ప్రసాదముఁ గైకొను మిప్పు; డింద మో చక్కెరబొమ్మ!" యంచు విలస న్మణికంకణ హస్త మంటి పే రక్కఱఁ గప్పురంపు విడె మా నెఱజాణ యొసంగి నిక్కి లేఁ జెక్కిలి ముద్దు వెట్టుకొనెఁ; జెప్పెడి దే మిఁక నా వినోదముల్! |
29 |
| ఉ. |
ఇగ్గెడు వెనక్కుం బయికి నీడ్చినఁ; బైఁటఁ దొలంగఁ జేయఁ గే లొగ్గెడు; రెమ్మి పోఁకముడి యూడ్చినఁ గ్రుంగిలి రెండు కొంగులున్ బిగ్గ నడంచుచున్ విడిచిపెట్టదు; బాల ననం బనేమి? యా సిగ్గుకు సిగ్గు లే దిటులు సేసిన పిమ్మట నుండవచ్చునే? |
30 |
| తే. |
"కోర్కి వెలయంగ నిను దెచ్చి కూర్చినట్టి తియ్య విలుకాని ఋణ మెందుఁ దీర్చుకొందు నువిద! నీ చేయి చూచుక యున్న నాకు నింద మని వేగ నీవి నీ వియ్యకున్న? |
31 |
| సీ. |
మకరకేతనుఁ గూర్చి మకరికా లతలు నీ చెక్కుల వ్రాయంగ మ్రొక్కుకొంటిఁ; గుసుమాకరుని గూర్చి కుసుమ మాలికలు నీ వేనలిఁ దుఱుమంగ వేఁడుకొంటి; గంధవాహనుఁ గూర్చి గంధసారంబు నీ గుబ్బలఁ బూయంగఁ గోరుకొంటి; మృగలాంఛనుని గూర్చి మృగమదంబున నీకుఁ దిలకంబు దిద్దఁ బ్రార్థించుకొంటి; |
|
| తే. |
నిన్ను వరియించునప్పుడే యిన్ని చేయు వాఁడ నని మున్ను శృంగార వనములోన; వల పెఱిఁగి యేలుకోగదే కలికి!" యనుచుఁ గేళి కెలయించె నమ్ముద్దరాలి నపుడు |
32 |
| క. |
పొక్కిలి పొంతఁ గరం బిడి, చెక్కిలి చెంత నొక కొంత చిఱున వ్వొలయన్ జక్కిలిగింతలు గొలిపెన్ మిక్కిలి వింతలుగ రతికి మేకొన నంతన్ |
33 |
| ఉ. |
డాసిన నింగితం బెఱిఁగి డాయఁగ నేరక, తత్తరంబునన్ జేసిన సేఁతకున్ బదులు సేయ నెఱుంగక, మేను మేనితో రాసినయంతనే కళలు రంజిలి కౌఁగిట బాల యుండెఁ బో; యా సుఖ మింత యంత యన నైనది గాదు గదయ్య క్రీడికిన్ |
34 |
| ఉ. |
అంగజరాజ్య వైభవ సుఖాంబుధి నీ గతి నోలలాడి, చి త్రాంగద సేవఁ జేయ మలయధ్వజు నిల్లట పల్లుఁ డై, తదీ యాంగబలంబు గొల్వ నరుఁ డందుల రాజ్యము సేయుచుండ నా సింగపుఁ జిన్ని లే నడుము చెల్వకు గర్భము నిల్చె; నంతటన్ |
35 |
| శా. |
మించెన్ బోరచి కోరికల్; కడు విజృంభించెన్ దనుగ్లాని; కా న్పించెన్ మేచక కాంతి చూచుకములన్; జెక్కిళ్లపైఁ దెల్పు రె ట్టించెన్; గూర్కులు సందడించె; నడ చండించెన్; మృదామోదము న్గాంచెన్ వాతెఱ; యోసరించెఁ ద్రివళుల్ నానాఁటికిన్ బోటికిన్ |
36 |
|
 |
|