ఆంధ్రభారతి - శతకములు - గువ్వలచెన్న శతకము

క.	తెలుపైన మొగముగలదని తిలకము జుట్టును ద్యజించి తెల్లయిజారు\న్‌ దలటోపిఁగొనఁగ శ్వేతముఖులలో నొకఁడగునె ద్విజుఁడు గువ్వలచెన్నా!	41
క.	వెల్లుల్లిఁ బెట్టి పొగిచిన పుల్లని గోంగూరరుచిని బొగడఁవశమా? మొల్లముగ నూనివేసుక కొల్లగ భుజియింపవలయు గువ్వలచెన్నా!	42
క.	నీచున కధికారంబు బాచకునకు నాగ్రహంబుఁ బంకజముఖికి\న్‌ వాచాలత్వము బుధసంకోచముఁగడు బాధకములు గువ్వలచెన్నా!	43
క.	దుడ్డన నెఱుఁగవి తలిపాటొడ్డుగఁగొను విద్యచే మహోద్యోగము తా నడ్డైనఁగనులకీఁగల గొడ్డువలెఁ జరించుచుండు గువ్వలచెన్నా!	44
క.	బుడుతలు భోగంబులు సిరి యడరుకొలంది గనకార్యమందతిహితులై తొడరికడుఁ జెడుదు రిలపైఁ గుడియెడమలు లేకముందు గువ్వలచెన్నా!	45
క.	కసకసలు కాయగూరల బుసబుసలగు ఱొంపనుండు బుడుతలయందున్‌ రుసరుసలు కోపియందును గుసగుసలు రహస్యమందు గువ్వలచెన్నా!	46
క.	కరకర నమలుటయందును బరపరయగునెపుడు చుఱుకు వ్రాతలయందు\న్‌ జురచుర కాలుటయందును గొరకొరయగుఁ గోపదృష్టి గువ్వలచెన్నా!	47
క.	కలిమిగల లోభికన్నను విలసితమగు పేదమేలు వితరణియైనన్‌ జెలమైన మేలుకాదా? కులనిధియంభోధికన్న గువ్వలచెన్నా!	48
క.	విను మన్నీలశిఫార్సునఁ దనునమ్మినవానిపనులు ధ్వంసించువకీ ల్తనమున్నవాఁడు తిరిపెముఁ గొనునాతఁడు చల్లవాఁడు గువ్వలచెన్నా!	49
క.	సజ్జనులు సేయునుపకృతి సజ్జను లెఱుఁగుదురుగాక సజ్జనదూష్యుల్‌ మజ్జనమునైన నెఱుఁగరు గుజ్జగు నంబలినిగాక గువ్వలచెన్నా!	50